АСТАНА, 10 тамыз – Sputnik. Ақтөбе әкімдігі бұршақ жауатынын ескертті. Осыған байланысты қала тұрғындары өз мүлкін қауіпсіз жерге қоюы қажет, деп хабарлайды Sputnik Қазақстан.
Қалада үшінші тәулік қатарынан жаңбыр жауып тұр. Казгидрометтің мәліметіне сәйкес, кешеден бері түскен жауын-шашын мөлшері 74 мм болды. Бұл нормадан 4 есе артық болып тұр. Өткен түнде барлығы 95 ассенизатор шықты. Қазірдің өзінде 10 мотопомпа, 5 насостық станция жұмыс жасап тұр. Ал шығарылған судың көлемі 30 мың текше метрді құрады.
"Бүгін төтенше жағдайлар қызметі дабылды ескерту жариялады. Осыған байланысты дауыл, нөсер жауын, бұршақ жауады деп күтіледі. Еліміздің кейбір өңірлерінде кешеден бері бұршақ жауып, автокөліктер бүлінген жағдайлар болғаны алғаны белгілі. Сондықтан мүліктеріңізге абай болыңыздар. Ауа райының қолайсыз екенін ескерулеріңізді, қажеттілік болмаса, көшеде беймезгіл жүрмеуді сұраймыз", - дейді қала басшысы Азамат Бекет.
Синоптиктердің болжамы бойынша Ақтөбе аумағында осындай ауа райы алдағы күндері де сақталады.