АСТАНА, 1 тамыз – Sputnik. Қазақстанның сыртқы істер министрі Мұрат Нұртілеу Еуропалық одақтың сыртқы істер және қауіпсіздік саясаты жөніндегі жоғарғы өкілі Жозеп Боррельмен Астанада келіссөздер өткізді, деп хабарлайды Sputnik Қазақстан тілшісі.
Кездесу кезінде өңірлік және халықаралық мәселелер талқыланды. Орталық Азиядағы сын-қатерлер, соның ішінде аймақтағы климаттың өзгеруі, Ауғанстан мен Таяу Шығыстағы жағдай да сөз болды.
"Жұмысымыздың маңызды бағыттарының бірі – Қазақстан азаматтары үшін Еуроодақтың визалық режимін жеңілдету екенін бұған дейін де естіп жүрсіздер. Доктор Борреллмен осы түйінді шаруаның оң шешімін жуық арада табу мақсатында күш-жігер жұмылдыруға уағдаластық", - деді Нұртілеу арнайы брифингте.
Оның айтуынша, келіссөздер кезінде әлемде болып жатқан қақтығыстар да талқыланды. Соның бәрін Біріккен Ұлттар Ұйымы Жарғысындағы егемендік, тәуелсіздік және территориялық тұтастық қағидаттарына сай шешу қажет.
Айта кетері, Астанаға Еуропалық одақтың сыртқы істер және қауіпсіздік саясаты жөніндегі жоғарғы өкілі Жозеп Боррель келген болатын.