АЛМАТЫ, 26 шілде - Sputnik. Бішкек қаласында Қазақстанның Бас прокуроры Берік Асылов түркі мемлекеттері ұйымының Бас прокурорлар кеңесінің 3-ші отырысына қатысты, деп хабарлайды Қазақстанның Бас прокуратурасының баспасөз қызметі.
Іс-шарада еліміздің жоғары қадағалау органының басшысы Әзербайжан, Қырғызстан, Түркия және Өзбекстаннан келген әріптестерімен кездесті. Отырыстың басты тақырыбы қазіргі заманғы жаһандық сын-қатерлер мен қауіп-қатерлерге тиімді ден қою үшін одан әрі ынтымақтастықты нығайту мәселелері болды.
Сондай-ақ терроризмге, экстремизмге, сепаратизмге, есірткі трафигіне, трансұлттық қылмысқа, адам саудасына, заңсыз көші-қонға қарсы іс-қимыл саласындағы проблемалар қаралды.
Өз тарапынан Қазақстанның Бас прокуроры өзара сенімді нығайту, бейбітшілікті, тұрақтылық пен қауіпсіздікті қолдау үшін қолда бар әлеуетін ескере отырып, түркі мемлекетті ұйымына мүше мемлекеттердің Бас прокурорлары хатшылығының қызметін жандандыруды ұсына отырып, жалпы жұмыстың тиімділігін арттыруға бағытталған нақты шаралар кешенін қабылдауды ұсынды.