АЛМАТЫ, 26 шілде – Sputnik. Ақмола облысындағы 6 адамның өмірін қиған жол апатына кінәлі көлік жүргізушісі сотталды, деп хабарлайды Polisia.kz.
Жол апаты былтыр 15 желтоқсанда "Қостанай – Әулиекөл – Сурған" автожолында болған. Қайтыс болған 6 адамның екеуі бала.
ВАЗ-21114 автокөлігінің жүргізушісі рульді басқара алмай, Audi көлігімен соқтығысқан. Соққыдан Audi қарсы жолаққа шығып кетіп, Volvo тракторымен соғылған. Салдарынан жеңіл көлік өртеніп кетті. Сотқа дейін тергеу жүріп, сараптамалар жасалды.
“Ақмола облысының қылмыстық істер жөніндегі мамандандырылған ауданаралық сотының үкімімен ВАЗ-21114 автомашинасының 18 жастағы жүргізушісі ҚР ҚК 345-бабының 4-бөлігі “Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы” бойынша кінәлі деп танылып, ең төменгі қауіпсіздік қылмыстық-атқару жүйесі мекемесінде бес жылға жазасын өтейді”, - дейді ведомство.
Ер адам жеті жыл мерзімге көлік құралын басқару құқығынан айырылған, сондай-ақ сот апатқа кінәлі адамды жәбірленушілерге моральдық зиян келтіруге міндеттеді.