АЛМАТЫ, 22 шілде - Sputnik. 18 күннің ішінде Қазақстан аумағында 97 қылмыскер ұсталды, деп хабарлайды ішкі істер министрлігі.
"1-18 шілде аралығында Қазақстан аумағында ІІМ жедел қызметтері 97 қылмыскерді ұстады, оның 28-і шет мемлекеттердің сұрауы бойынша. Сонымен қатар хабар-ошарсыз кеткен 115 адамның орналасқан жері анықталды", - деп жазды министрлік.
Айта кету керек, қылмыскерлерді іздестіру тек Қазақстан аумағында ғана емес, сонымен қатар халықаралық келісімдер негізінде шет елдерде де жүзеге асырылып, онда іздестіру топтары жіберіледі.
"Мәскеу облысының Химки қаласында ресейлік әріптестермен бірлесіп жедел-іздестіру іс-шараларын өткізу кезінде қазақстандық азаматтар құрықталды. Олар өткен жылдың қаңтар айында Шымкентте жергілікті тұрғындарды ұрып-соққан. Жәбірленушілердің бірі алған жарақаттарынан көз жұмған. Қылмыстық іс бойынша барлық күдікті ұсталды", - дейді ведомство.
Сондай-ақ Санкт-Петербург қаласында 36 жастағы ер адам ұсталды. Ол 2019 жылы семейлік тұрғынды алдап, құны 50 млн теңге болатын бульдозерді иемденген.
Қазақстан мен Ресейдің құзырлы органдары ұсталғандарды экстрадициялау туралы мәселені қарастырып жатыр.