АСТАНА, 22 шілде - Sputnik. Жалпы ұзындығы 245 шақырымды құрайтын "Қазталов-Жәнібек-РФ шекарасы" (142 шақырым) мен "Өнеге-Бисен-Сайқын" (103 шақырым) күре жолдарында атқарылып жатқан күрделі жөндеу жұмыстары аяқталуға жақын.
Бірінші жобада асфальт төсеу жұмыстары толығымен аяқталса, екінші күре жолдың 10 шақырымын ғана салу қалды. Бұл туралы көлік министрі Марат Қарабаев Батыс Қазақстан өңіріне жұмыс сапары аясында айтты.
"Қазталов-Жәнібек-РФ шекарасы" күре жолының 142 шақырымына жаңа асфальт төселді. Қазір күрделі жөндеу жұмыстарының соңғы сатысы жүзеге асып жатыр. Жол мамандары жол қауіпсіздігін арттыру мақсатында елді мекендер арқылы өтетін жол бөлігіне жарықтандыру орнатып, қажетті жол белгілерін орнатып жатыр. Жолды пайдаланушыларға ыңғайлы болу үшін бес жаңа санитарлық гигиеналық торабы бар демалу алаңдары да қарастырылған.
Еске сала кетейік, бұл жол облыс орталығын Казталов, Жәнібек және Бөкей ордасы аудандарымен байланыстырып, Ресей Федерациясына шығуға мүмкіндік береді.
Мердігер ұйым Өнеге-Бисен-Сайқын күре жолының соңғы 10 шақырымын салып, аяқтайды. Бір ай ішінде мамандар жолды абаттандыру жұмыстарына кіріседі.
Күрделі жөндеу жұмыстары аясында жаңа жарықтандыру мен жол белгілерін орнатып, жол таңба сызығын сызады. Сонымен қатар, жол мамандары Жәңгір хан резиденциясына (Р-56 "Хан Ордасы ауылына кіреберіс жол") апаратын жалғыз жолға орташа жөндеу жұмыстарын жүргізеді. Бұл учаске республикалық маңызы бар "Өнеге-Бисен-Сайқын-РФ шекарасы" автожолының және Батыс Қазақстан облысы Бөкейорда ауданы Хан Ордасы ауылының арасында орналасқан.
Нысандарда 370 техника мен 500 адам жұмыс істейді.
Күре жолдар халық игілігіне берілген соң көлік қарқыны бірнеше есе артады деп күтілуде. Барлық жұмыс биыл жылдың соңына дейін аяқталады.