АЛМАТЫ, 17 шілде – Sputnik. Шығармашылық сала мамандарын даярлауға 1600-ден астам білім гранты бөлінді, деп хабарлады Мәдениет және ақпарат министрлігі.
Ведомство 10 оқу орнында шығармашылық сала мамандарын даярлайды. Олар – 4 жоғары оқу орны, 4 колледж және 2 арнайы мектеп.
"2024-2025 оқу жылына 895 бакалавриат, 166 магистратура және 26 докторантураға білім грантын бөлу туралы шешім қабылданды. Кәсіптік және техникалық білім беру мекемелері арасында 550 бюджеттік орын бөлінді. Бұл өткен оқу жылымен салыстырғанда 50 грантқа артық", - деп жазды ведомство.
Сарапшылар ең алдымен еңбек нарығының қажеттіліктерін ескерді. Шығармашылық салада музыкалық театр режиссерлеріне, музыкатанушыларға, реставратор-суретшілерге және сценаристерге сұраныс жоғары, дейді министрлік.
Сол себепті жаңа білім беру бағдарламаларын ашып, гранттар санын көбейту арқылы осы мамандықтар бойынша кадр даярлау ұсынылды.