АСТАНА, 14 шілде – Sputnik. Ұлттық статистика бюросы алдағы ауылшаруашылығы санағы үшін ақпараттық жүйелер мен қызметтерді сынақтан өткізіп жатыр.
Үкіметте өткен кеңесте премьер-министрдің орынбасары Серік Жұманғаринге пилоттық санаққа дайындық барысы және басқа да аспектілер туралы баяндалды.
Ұлттық статистика бюросы (ҰСБ) мәліметі бойынша пилоттық санақ 2024 жылдың 20 тамызы мен 30 қыркүйегі аралығында өтеді.
"Респонденттер санақ парақтарын sanaq.gov.kz. мамандандырылған сайтта онлайн режимінде өз бетінше толтыра алады. Сонымен қатар бюроның аумақтық бөлімшелерінің қызметкерлері пилоттық жоба үшін арнайы таңдалған 54 елді мекендегі шаруашылық өкілдеріне іріктеп сауалнама жүргізеді", - деп жазылған үкіметтің баспасөз қызметі таратқан хабарламада.
Сондай-ақ жиында мал және өсімдік шаруашылығы статистикасын өзектендіру мәселелері талқыланды.
Бұған дейін хабарланғандай, 2023 жылғы мал шаруашылығы бойынша деректер жаңартылып, мамандандырылған ҰСБ бюллетенінде жарияланады.
Ауыл шаруашылығы вице-министрі Азат Сұлтанов өсімдік шаруашылығындағы деректерді өзектендіру жалғасып жатқанын және оны тамыз айында аяқтау жоспарланып отырғанын айтты.
Кеңес қорытындысы бойынша вице-премьер Ұлттық статистика бюросына ауыл шаруашылығы санағын өткізудің мақсаттары мен тәртібі туралы түсіндіру жұмыстарын күшейтуді, сондай-ақ өсімдік шаруашылығы туралы мәліметтерді өзектендіру жұмыстарын сапалы аяқтауды тапсырды.