АСТАНА, 10 шілде – Sputnik. Спикерлер 11-12 шілдеде ТМД Парламентаралық Ассамблеясының (ПАА) штаб-пәтерінде – Таврид сарайында өтетін Х БРИКС Парламенттік форумының іс-шараларына қатысады, деп хабарлады ТМД ПАА баспасөз қызметі.
Форумның соңғы күні, 12 шілдеде ТМД ПАА кеңесінің отырысы өтеді. Іс-шара ТМД ПАА Кеңесінің төрағасы, Ресей Федерациясы Федералдық Жиналысы Федерация Кеңесінің төрағасы Валентина Матвиенконың жетекшілігімен өтеді.
Отырысқа мына елдердің парламент спикерлері қатысады: Әзербайжан – Сагиб Гафарова, Беларусь – Наталья Кочанова (Республика Кеңесі) және Игорь Сергеенко (Өкілдер палатасы), Қазақстан – Мәулен Әшімбаев (Сенат), Қырғызстан – Нұрланбек Шәкиев, Ресей – Валентина Матвиенко (Федерация Кеңесі), Тәжікстан – Махмадтоир Зокирзода (Намояндагон Мәжілісі) және Өзбекстан – Танзила Нарбаева (Сенат).
Кеңес жұмысына Армения Ұлттық Жиналысының вице-спикері Рубен Рубинян мен Ресей Мемлекеттік Думасының вице-спикері Иван Мельниковтың қатысуы да жоспарланған. Қазақстан Парламенті Мәжілісінің атынан Халықаралық істер, қорғаныс және қауіпсіздік комитетінің төрағасы Айгүл Құспан қатысады.
Кеңес отырысында Палестина мемлекетінің Газа секторындағы жағдай туралы мәлімдеме қабылдануы мүмкін деп болжануда. Сондай-ақ парламентарийлер ТМД ПАА-да бақылаушы мәртебесі туралы ережені де қарастыруға тиіс.
Парламентшілер Әзербайжан Республикасының кезектен тыс президент сайлауын, Беларусь Республикасындағы парламент сайлауын, сондай-ақ Ресей Федерациясы президентінің сайлауын бақылауға ТМД ПАА халықаралық бақылаушыларының қатысуын талқылайды.
ТМД ПАА Кеңесінің бас хатшысы Дмитрий Кобицкий Өзбекстан Республикасы Олий Мәжілісінің Заң шығару палатасы мен Әзербайжан Республикасы Милли Мәжілісінің сайлауын бақылау үшін Ассамблеяның халықаралық бақылаушыларын дайындау туралы пікір алмасады. Кеңес мүшелері 2024 жылы Шыңғыс Айтматов атындағы ТМД ПАА сыйлығын алатын үміткерлерді қарайды.
Сонымен қатар жиында Ассамблеяның 2023 жылғы жұмысының қорытындысы шығарылады.