АСТАНА, 9 шілде – Sputnik. Келесі жылдан бастап карьерлік самосвалдардың жалпыға ортақ пайдаланылатын жолдарға шығуына тыйым салынады. Бұл туралы үкімет отырысында көлік министрі Марат Қарабаев мәлімдеді, деп хабарлайды Sputnik Қазақстан тілшісі.
Министр жүк көліктерінің салдарынан жолдар бұзылатынын атап өтті. Қазіргі кезде 450 мыңнан астам жүк көлігі тіркелсе, соның 60 мыңы рұқсат етілген 25 тонна жүк тасу көлемін сақтамайды.
"Бұл жолдардың бұзылуына тікелей әсер етеді. Осыған байланысты карьер иелерінің салмақ параметрлерін сақтау бойынша жауапкершілігін күшейту, карьерлік самосвалдардың жалпыға ортақ пайдаланылатын жолдарға шығуына тыйым салуға тиісті заңнамалық түзетулер әзірленді", - деді Қарабаев.
Аталған нормаларды қыркүйек айына дейін мәжіліске енгізіп, 2025 жылдың басынан бастап күшіне енгізу жоспарланып отыр.
Сондай-ақ келесі жылдың аяғына дейін автокөліктің салмағын өлшейтін 220 станция орнату жұмыстары басталды.
Өлшеу станциялары заң бұзушылықтарды онлайн тіркеп, айыппұлды "Сергек" бағдарламасы форматында рәсімдейді.