АСТАНА, 4 шілде – Sputnik. Қазақстан президент Қасым-Жомарт Тоқаев Астанадағы ШЫҰ саммитінде сауда-экономикалық байланыстарды кеңейту ынтымақтастықтың тағы бір маңызды бағыты екеніне назар аударды, деп хабарлады Ақорда.
"Әлемдік экономикада жағымсыз үрдістер белең ала бастады. Дүниежүзілік банктің мәліметі бойынша биыл жаһандық экономиканың өсім қарқыны бәсеңдейді. Әлем экономикасының өсіміне серпін беретін жаңа бағыт және мүлде басқа даму парадигмасы қажет екені анық. Сондықтан, біздің ойымызша, сауда-экономикалық кооперацияны кеңейту, капитал мен технологияның еркін қозғалысына жағдай жасау, климаттың сын-қатерлерімен күресу – Шанхай ұйымының маңызды міндеттері", - деді Тоқаев.
Мемлекет басшысы өзара сауда-саттықтың артуы ШЫҰ кеңістігі үшін ортақ үрдіске айналып келе жатқанын айтты.
"Мәселен, Қазақстанның ШЫҰ елдерімен сауда көлемі өткен жылдың қорытындысы бойынша 6,5 пайызға өсті. ШЫҰ-ға мүше елдердің технологиялық базасы үлкен және экономиканың барлық маңызды секторларын дамыту үшін орасан зор нарығы бар. Арнайы салық, кеден және көші-қон режимдерінің әзірленуі аталған бағытта ілгерілеуге айтарлықтай септігін тигізеді. Осы ретте ШЫҰ аясында Экономикалық жеңілдіктер базасын құру туралы Қазақстанның ұсынысы өзекті болып қала береді. Инвестициялық жобаларды талқылап, бекіту үшін бірыңғай алаң құру қажеттігі айқындала түсті", - деді президент.
Тоқаевтың айтуынша, "Астана" халықаралық қаржы орталығының базасында Жобалық қызметті қаржымен қамтамасыз ету механизмін құру ұсынылды. Себебі, Қытай, Ресей, Үндістан, Өзбекстан, Қырғызстан қазірдің өзінде аталған алаңда белсенді жұмыс істеп жатыр. Жалпы, қаржы орталығы резиденттерінің 20 пайызы – ШЫҰ-ға мүше мемлекеттердің компаниялары.
Мемлекет басшысы тиімді дәліздер мен сенімді тасымал тізбектерін құру арқылы көлік байланыстарын нығайтуды ынтымақтастықтың келесі бағыты ретінде атады.
"Біз Қытайдың "Бір белдеу, бір жол" мегажобасын, Транскаспий халықаралық көлік бағдарын және "Солтүстік – Оңтүстік", "Орталық Азия – Оңтүстік Азия" бағыттары бойынша трансеуразиялық дәлізді одан әрі бірлесе дамытуға баса мән береміз. Бұл жоспарларды жүзеге асыру үшін ШЫҰ аясында Стратегиялық порттар мен логистикалық орталықтардың серіктестік желісін құру жөнінде нақты шаралар қабылдау маңызды", – деді Қасым-Жомарт Тоқаев.