АСТАНА, 4 шілде – Sputnik. Түрікменстан халық мәслихатының төрағасы Гурбангулы Бердімұхамедов ШЫҰ саммитіне қатысу үшін Астанаға келді, деп хабарлады үкіметтің ресми сайты.
Әуежайда түрікмен халқының ұлттық көшбасшысын Қазақстан премьер-министрі Олжас Бектенов қарсы алды.
"Гурбангулы Бердімұхамедов алғаш рет өткізіліп отырған "ШЫҰ плюс" форматындағы кездесуге қатысады, ол "Көпжақты диалогты нығайту – орнықты бейбітшілік пен дамуға ұмтылу" ұранымен өтеді", - деп жазды ведомство.
Қазақстан мен Түрікменстан арасындағы дипломатиялық қатынастар достық пен стратегиялық әріптестік негізінде дамуда. Транзиттік-көлік саласында бірлескен өзара тиімді жобалар бар, газ саласындағы ынтымақтастықты дамыту бойынша қадамдар белгіленген.
Өткен жылдың қорытындысы бойынша Қазақстан мен Түрікменстан арасындағы өзара сауда көлемі $563 млн болды, 2022 жылмен салыстырғанда 28%-ке ұлғайды. Биылғы 4 айда өзара сауда көлемі $167,8 млн-ға жетті.