АСТАНА, 1 шілде – Sputnik. Президент Қасым-Жомарт Тоқаев Қырғызстанның Ош облысы Нооқат ауданында сел жүру салдарынан адамдардың қаза табуына байланысты Қырғыз Республикасының президенті Садыр Жапаровқа көңіл айту жеделхатын жолдады, деп хабарлады Ақорда.
"Қазақстан халқының және жеке өз атымнан қаза тапқан азаматтардың отбасы мен жақын туыстарына қайғырып көңіл айтамын. Сондай-ақ зардап шеккендердің тезірек сауығып кетуіне тілектестік білдіремін", – деп жазылған жеделхатта.
Тоқаев Қазақстан тату көршілік және өзара қолдау рухында табиғат апаты болған елді мекенге гуманитарлық көмек жібергенін атап өтті.
"Қажет болған жағдайда, бауырлас Қырғызстанға жәрдем беруге әзірміз", - деп түйіндеді президент.
Соңғы мәлімет бойынша Қырғызстанда селден 10 адам көз жұмды. Оның төртеуі Қазақстан азаматы. Олардың денесі Өскеменге арнайы бортпен жеткізілді.