АСТАНА, 27 маусым – Sputnik. Қазақстан президенті Қасым-Жомарт Тоқаев журналистерге пәтер кілтін табыстау дәстүрі жалғасатынын мәлімдеді, деп хабарлайды Sputnik Қазақстан.
Бүгін Тоқаев БАҚ өкілдерін Ақордада марапаттады. Оның айтуынша, кез келген еңбек бағалануға тиіс. Өркениетті қоғам масс-медиа майталмандарын ерекше қадірлейді. Қазақстанда жыл сайын елімізде үздік журналистерге сыйлықтар табысталады.
"Бүгін ортамызда осы салада жарты ғасырға жуық қызмет атқарған азаматтар бар. Аймақтағы журналистиканың көшін бастаған тұлғалар да аз емес. Осы жиынға әр облыстың бұқаралық ақпарат өкілдерін арнайы шақырдық. Бір сөзбен, бұл жерде нағыз майталман мамандар отыр. Сондықтан мен ақпарат саласына ерекше еңбек сіңірген бір топ азаматты мемлекеттік наградамен марапаттау туралы шешім қабылдадым", - деді Тоқаев.
Президент былтыр мереке қарсаңында мемлекеттік БАҚ-та істейтін журналистерге пәтер табысталғанын да еске алды.
"Бұдан бөлек, былтырдан бері мереке қарсаңында журналистерге пәтер кілтін табыстауды дәстүрге айналдырдық. Бұл үрдіс биыл да, алдағы уақытта да жалғаса береді", - деп атап көрсетті Тоқаев.