АЛМАТЫ, 8 маусым - Sputnik. Қазақстанда өндірілген дәрілік заттар 1 шілдеден бастап таңбаланады. Бұл туралы үкіметте вице-премьер Серік Жұманғариннің төрағалығымен өткен кеңесте белгілі болды, деп хабарлады премьер-министрдің ресми сайты.
Тиісті өзгерістер 2020 жылғы 10 қыркүйектегі үкімет қаулысына енгізілді.
Ведомствоның мәліметінше бұл дәріханалар мен дистрибьюторларға таңбалау кодтарын есепке алу және қадағалау үшін ақпараттық жүйелердің интеграциясын нақтылауға мүмкіндік береді.
Денсаулық сақтау вице-министрі Ербол Оспановтың айтуынша 1 маусымдағы жағдай бойынша 383 көтерме қойманың 287-сі қажетті жабдықтармен жабдықталған, 15 өңірде тексеріс жүргізілді. Жақын арада қалған 5 өңір тексеріледі.
"Жалпы Қазақстанда цифрлық таңбалауды енгізу оң нәтиже берді: мысалы аяқ киімнің ресми (анықталған) импорты 2019 жылы 39,5 млн жұптан 2023 жылға қарай 54,5 млн жұпқа дейін өсті. Бизнеске аяқ киімнің қалдықтарын белгілеу үшін үш жылға жуық кезең берілді, бұл 2021 жылдың 1 қарашасынан 2024 жылдың 1 маусымына дейін", - деп жазды премьер-министр сайты.
Сонымен қатар кеден қоймалары аяқ киімді таңбалауға дайын болмағандықтан өнеркәсіп және құрылыс министрлігіне импорттаушылардың өз қоймаларында аяқ киімді таңбалауға рұқсат беру мәселесін пысықтау тапсырылды.