АСТАНА, 27 мамыр – Sputnik. Алматы облысында 37 адам мінген автобус аударылды, деп хабарлайды Sputnik Қазақстан облыстық әкімдікке сілтеме жасап.
Жол апаты бүгін сағат 10:20-да Кеген ауданында болған. Еңбекшіқазақ ауданымен шекаралас аумақта туристер мінген автобус аударылып кетті. Алдын ала мәліметке сәйкес, жолаушылар автобусы "Қазавтожол" желісіне жататын күрделі жол бұрылысында жолдан шығып кеткен.
"Апат орнына дереу Кеген ауданынан екі жедел жәрдем бригадасы шықты. Автобуста 37 адам болған. Кеген аудандық ауруханасына 5 адам, Жалағаш аудандық ауруханасына 4 адам, Шелек ауылына 4 адам жеткізілді", - дейді әкімдік мамандары.
Жол апатынан қайтыс болғандар жоқ. Қазіргі кезде оқиғаның мән-жайы анықталып жатыр, тергеу шаралары басталды. Зардап шеккендердің жағдайы тұрақты, туристер дәрігерлердің бақылауында жатыр.