АСТАНА, 26 мамыр – Sputnik. Жетісу облысында шаруа қожалығының бір жыл бұрын жоғалған жылқылары табылды, деп хабарлайды Sputnik Қазақстан Polisia.kz порталына сілтеме жасап.
Шаруа қожалығы Ескелді ауданында орналасқан. Ол жерде 2023 жылдың мамыр айында бір табын жылқы жоғалды. Шаруа қожалығының иесі бірден полицияға арыз жазды.
"Полицейлер жеке уақыттарымен санаспай, күн-түн демей жоғалған жылқыларды іздеп тапқан. Ал қожалықтың басшысы ұрланған жылқыларды тауып, қайтарып бергендері үшін полицияға өз алғысын білдірді", - дейді тәртіп сақшылары.
Ресми мәліметке сәйкес, жыл басынан бері полиция мал ұрлығын кәсіп еткен 200-ден астам адамды, оның ішінде 26 қылмыстық топты құрықтады. Биыл осы қылмыс үшін 65-тен астам адам сотталды. Олардың жартысы 5 жылдан асатын мерзімге бас бостандығынан айырылды.