АСТАНА, 15 мамыр – Sputnik. 15 мамырдан бастап Шығыс Қазақстанда сел қауіпті кезең басталды, деп хабарлады облыс әкімдігінің баспасөз қызметі.
Өңірде Катонқарағай және Зайсан аудандарында, Риддер қаласында және Алтай ауданында орналасқан барлығы 13 сел қауіпті ошақтар бар.
"Жоғарыда аталған аудандардағы тау басында 11 елді мекенге қауіп төндіретін 144 морена көлі қалыптасады. Мамандар жыл сайын қауіпсіздік мақсатында көлдер мұздан әлі ашылмаған сәттен бастап және сел қаупі бар жағдайды бақылау үшін олардың мұздан толық ашылуына дейін тексеру жүргізеді", - делінген хабарламада.
Облыста сырғыма қаупі бар 9 учаске бар. Бұлар негізінен автожолдардағы, өзен бассейндеріндегі таулардың жағалық беткейлері мен құлдилары: Риддер қаласы -Громотуха, Уба; Алтай ауданы - Бұқтырма, Хамир,Черновая ; Катонқарағай ауданы -Бұқтырма; Зайсан ауданы - Кендірлік.
Сел және сырғыма қаупі бар кезеңнің қауіпсіз өтуіне әзірлік мақсатында Төтенше жағдайлар департаменті "Қазселденқорғау" ММ-нің Шығыс Қазақстан аумақтық пайдалану басқармасы филиалымен бірлесіп, сел және сырғыма қаупі бар учаскелерде облыс халқы мен инфрақұрылымының қауіпсіздігі қамтамасыз ету жөніндегі іс-шаралар жоспарын дайындады.
"Өзен арналары және сел, сырғыма қауіпті учаскелері бойынша жоспарлы жерүсті және аэровизуалды зерттеу кестесі әзірленді", - деп атап өтті әкімдік.
Мореналық көлдерде батиметриялық жұмыстар жоспарланған. Сел қаупі бар учаскелерде 20 ескерту және тыйым салу қалқандары және сырғыма қауіпті учаскелерде 18 қалқан орнатылды, көшкін сел және сырғыма қаупі бар аудандардың жергілікті атқарушы органдарына, объектілері мен құрылыстары ықтимал сел қаупі бар учаскелерде орналасқан кәсіпорын басшыларына, жеке үй иелеріне хабарламалар-ұсынымдар берілді.
Сел, сырғыма жағдайына мониторинг жүргізу үшін 9 маусымдық гидропост және 1 жыл бойғы гидропост жұмыс істейді.
ШҚО ТЖД және ШҚ "Қазселденқорғау" филиалы сел тасқынынан қатерден құтылу арқылы ғана құтылуға болатынын еске салады. Қауіпсіздік мақсатында сел қаупі бар кезеңде тауларға барудан бас тартқан жөн. Төтенше жағдай кезінде 112 нөмірі бойынша хабарласу қажет.