АСТАНА, 20 сәуір – Sputnik. Мысырда өткен спорттық бағдарламалаудан әлем чемпионатында қазақстандық Батыр Сардарбеков алтын медаль иеленді, деп хабарлайды Sputnik Қазақстан.
Сардарбеков финалда Harbour Space University (Барселона, Испания) командасының құрамында өнер көрсетті. Олар турнир кезінде бірден көш бастап, финалда жеңіске жетті. Қазақстанның спорттық бағдарламашылары 20 жылдан бері ICPC жарыстарына қатысып келеді. Осы жолы алғаш рет тарихи жетістікке жетті.
Финалда қазақстандық командалар да өнер көрсетті. Олар: Astana IT Университет (Астана), Қазақ-британ техникалық университеті (Алматы), Назарбаев Университет (Астана), Халықаралық ақпараттық технологиялар университеті (Алматы). Екеуі финалға дейін жеткен. Қазақстанның атынан қатысатын командалардың саны жыл сайын артып келеді.
Биыл ICPC World Finals 2024 чемпионаты Қазақстанда өтеді. Финал қыркүйек айында Астанада ұйымдастырылады.