"Таза Қазақстан" акциясына 180 мыңнан астам адам қатысты

АСТАНА, 13 сәуір – Sputnik. "Таза Қазақстан" республикалық акциясына жастар мен волонтерлік ұйымдар белсенді қатысып жатыр, деп хабарлады Қазақстанның мәдениет және ақпарат министрлігінің баспасөз қызметі.

Президенттің аймақтардағы елді мекендерді абаттандыру және көгалдандыру бойынша тапсырмасын орындау аясындағы акцияның "Таза өлке" деп аталатын бірінші аптасының қорытындысы бойынша іс-шараға 181,7 мың адам қатысқан.

Атап айтқанда, Алматы, Шымкент, Қызылорда, Жамбыл және Түркістан облыстарында 1,6 мыңнан астам экологиялық акция ұйымдастырылды.

"Алматы облысында 1,6 мың тоннадан астам, Жетісу облысында 679 тонна қоқыс шығарылып, Түркістан облысында 1,5 мың көшет, 34,5 мың гүл отырғызылды", - деп жазылған хабарламада.

Сонымен қатар, су тасқыны болған аймақтарды қалпына келтіру шаралары жалғасып жатыр.