АЛМАТЫ, 28 наурыз – Sputnik. Төрт облыста республикалық маңызы бар бес жолды қызылсу басып жатыр, деп хабарлайды Қазавтожол.
Мамандардың айтуынша, Абай, Ақтөбе, Қостанай және Ұлытау облыстарындағы жолдарда жағдай күрделі. Жалпы республикадағы жолдардың басым көпшілігін еріген қар суы алып жатыр.
"Абай облысындағы "Қарағанды – Аягөз – Тарбағатай - Боғаз" автожолының 707-941 шақырымында жеңіл автомобильдер үшін шектеу қойылды. Жолдың 878 және 923 км-де диаметрі 1 метр болатын бір нүктелі құбыр және екі аралықты көпір бар. Жол төсемін сақтап қалу үшін жол жиектері нығайтылып, жасанды біліктер жасалып жатыр", - дейді Қазавтожол мамандары.
Ақтөбе облысында "Қандыағаш – Ембі - Шалқар - Ырғыз" автожолының 288 шақырымында да осындай жағдай.
"Жолдың осы учаскесінде диаметрі 1,5 м болатын бір нүктелі су өткізгіш құбыр бар, одан әрі су ағынын болдырмау үшін 650 қап құм төселді. Сонымен қатар қосымша 480 тонна құм жеткізілді. Толып кету салдарын жою үшін жол жұмысшылары жұмылдырылды", - дейді ведомстводағылар.
Бұл жолмен жүруге көліктің барлық түріне шектеу қойылды.
Осы облыстағы "Самара-Шымкент" автожолын да қызыл су басып жатыр. Бұл жолда жеңіл автомобильдер үшін қозғалыс уақытша тоқтатылды.
Сондай-ақ Қостанай облысы "Жезқазған-Петропавл" автожолы 269 км-і еріген қар суының астында қалды.
"Бұл аумаққа да құбырлар қойылды. Жолдағы уақытша өзгерістерді белгілеу үшін уақытша жол белгілері мен сигналдық бағандар орнатылды. Жол төсемін оқшаулау үшін көлемі 150 текше метр инертті материал ағаш, қоқыс тас дайындалды. 3 бірлік техника және 9 адам жұмылдырылды", - дейді жол мамандары.
Ұлытау облысында да дәл осындай жағдай. "Ақшатау – Ортау - Бидайық" автожолын су басып жатыр. Дәл қазіргі уақытта республикалық маңызы бар қауіпсіздікті қамтамасыз ету үшін жалпы саны 610 бірлік техника және 1558 адам жұмылдырылды.