АСТАНА, 22 наурыз – Sputnik. Қазақстан мен Қытайдың алдында тауар айналымын 40 миллиард долларға дейін ұлғайту міндеті тұр. Бұл туралы Қазақстанның сауда және интеграция министрі Арман Шаққалиев мәлімдеді, деп хабарлады ведомствоның баспасөз қызметі.
"Ынтымақтастығымыздың стратегиялық сипаты жоғары деңгейде қолдау тауып отыр. Біз елдеріміз арасындағы қарым-қатынас пен достықтың жаңа алтын отыз жылын жарияладық. Қазақстан мен Қытай арасындағы өзара сауда рекордтық деңгейге жетті. Біздің алдымызда тауар айналымын 40 миллиард долларға дейін арттыру міндеті тұр", - деді министр Сычуань провинциясындағы сауда-экономикалық миссиясы барысында.
Ол қазақстандық кәсіпорындардың өнеркәсіптік және ауылшаруашылық өнімдерін құны 1 миллиард доллардан асатын қосымша 135 тауар позициясы бойынша ұсынуға дайын екенін мәлімдеді. Бұл салқындатылған ет, балық өнімдері, құс еті және субөнімдері және басқа да маржасы жоғары тауарлар болуы мүмкін.
"Статистика көрсеткендей, Қытай Қазақстанның рапс майының негізгі сатып алушысы болып саналады, оның үлесі әр жылдары 74%-дан 98%-ға дейін жетті. Отандық зауыттар көршілес нарыққа сары май және май өнімдерін жеткізуді арттыруға қабілетті және оның әлеуеті 250 мың тоннадан асады", - делінген хабарламада.
2023 жылы қазақстандық өнімдердің Қытайға экспорты 12,6%-ға өсіп, 14,7 миллиард долларды құрады, ал Қытайдың Қазақстанға импортына келетін болсақ, өткен жылы оның көлемі 50,5%-ға өсіп, 16,8 миллиард долларды құрады.
Кездесулер мен келіссөздер нәтижесінде қазақстандық бизнес 75,2 миллион долларға күнбағыс, соя, мақсары майы, кондитерлік өнімдер, жемдік ұн және басқа да ауыл шаруашылығы өнімдерін жеткізуге экспорттық келісімшарттарға қол қойды.
Ведомство 2024 жылдың 26 наурызында Астанада "Қазақстан мен Қытай арасындағы сауда қатынастарын дамытудағы жаңа тәсілдер" тақырыбында Экспортшылардың екінші форумы өтетінін еске салды. 100-ден астам ірі қытай компаниялары, соның ішінде Сычуань кәсіпкерлері елордаға әлеуетті серіктестер іздеп келеді және олармен келісімдер жасайды. Олардың ішінде тамақ өнеркәсібі, машина жасау, металлургия, құрылыс, логистика, фармацевтика секторлары, сондай-ақ инвестиция, қызмет көрсету және тағы басқа компаниялар бар.