АЛМАТЫ, 20 наурыз - Sputnik. Ақтөбе облысында жолды су алып жатыр, деп хабарлайды Қазавтожол.
20 наурызда сағат 06:00 шамасында Қандыағаш-Ембі-Шалқар-Ырғыз тас жолының 288-ші шақырымын қызыл су басып жатыр.
"Күннің жылынып, қардың кенет еруіне байланысты жолды су алды. Жолды басқан судың ұзындығы 300 м және биіктігі 20-30 см. Қызыл суды бөгеу үшін диаметрі 1,5 метр құбыр орнатылды", - дейді жолшылар.
Қазір жолдың су басқан бөлігіне ескерту белгілері қойылып, тәулік бойы бақылауға алынды. Жұмысқа үш адам мен екі техника жұмылдырылды. Қазіргі уақытта жолда көлік қозғалысына шектеу қойылған жоқ.