АСТАНА, 17 наурыз – Sputnik. Қазақстандағы дипломатиялық өкілдіктерде дауыс беру процесі қалыпты жағдайда өтіп жатыр. Бұл туралы Ресей Федерациясының Қазақстандағы төтенше және өкілетті елшісі Алексей Бородавкин мәлімдеді.
"Бәрі қалыпты жағдайда өтіп жатыр, дауыс беру процесін қиындататын қандай да бір жағымсыз жайттар болған жоқ, қоғамдық тәртіпті бұзу, арандату оқиғалары болмады. Бұл Қазақстандағы Ресей азаматтарының өз ерік-жігерін білдіруіне байыппен қарайтынын, оң көзқарас танытып, дауысын сараптап барып беретінін көрсетеді, олар қабылданған шешім үшін жауапкершілікті жақсы түсінеді", - деді Алексей Бородавкин.
Қазақстан билігі сайлау учаскелеріндегі қауіпсіздікті қамтамасыз ету туралы өтінішке өте мұқият қарады, деп толықтырды ол.
"Біз оларға осы үшін ризамыз. Мен айтқанымдай, бәрі ешқандай шектен шығусыз және арандатусыз өтіп жатыр. Сонымен қатар қазақстандық достарға парламентшілер тобы сайлауды бақылау үшін Ресейге барғаны үшін алғыс айтамын. Бұл біздің елдеріміз бен халқымыз арасындағы достық, одақтастық қатынастардың көрінісі", - деп атап өтті Ресейдің Қазақстандағы елшісі.
Жалпы Қазақстанда СІМ желісі бойынша жеті сайлау учаскесі ашылды, оның екеуі Астанада және екеуі Алматыда. Дауыс беру Байқоңыр аумағында да жеке өтеді.
"Біз дауыс беру күні Қазақстанда Ресей азаматтарының ерік-жігері Ресей заңнамасына сәйкес ұйымдасқан түрде өтуі үшін осы күнге өте мұқият дайындалдық. Сайлау учаскелері уақытында ашылды. Қазір олар толықтай, тіпті кейбірі шамадан тыс жүктемелермен жұмыс істеп жатыр", - деп түйіндеді Алексей Бородавкин.