АСТАНА, 14 наурыз – Sputnik. Амал мерекесіне орай Алматыдағы Орталық музейде "Ұлы даланың ұлттық дәстүрлері" ІІ халықаралық ғылыми форумы ашылды, деп хабарлады 24KZ.
Ауқымды шарада этнограф ғалымдар, музей қызметкерлері түркі дүниесіне ортақ тарихи-мәдени құндылықтарды насихаттауда өзара іс-қимылдарды ортаға салды.
Форум аясында Қазақстан Орталық музейінің қорындағы бесік жинағы алғаш рет көрермен назарына ұсынылды. Форум қонақтары алдымен бесік көрмесін тамашалады. Мұнда музей қорындағы әр жылдарда жасалған 15-ке жуық бесік қойылған. Мына бесіктің жасалғанына 120 жыл болыпты. Төрт ұрпақтың балалары жатқан деген мәлімет бар. Ол этнографиялық экспедиция барасында Қызылорда өлкесінен әкелінген. Ал кейбірінің жасалған жылы, шыққан жері, иесі беймәлім.
Көрмедегі ең назар аудартатын көне бесіктердің бірі мына талбесік құба талдан иіліп жасалған. Бір ерекшелігі, бұл бесікті жасағанда ешқандай шеге қолданылмаған. Талдың жас шыбықтарын иіп, арқанмен бекіткен.
Зерттеушілердің айтуынша, бұл бесіктің қай кезде жасалғаны әзірге белгісіз. Бұл бесікті музейдің қорына биыл ғана фотосуретші-саяхатшы Таймас Нұртаев тапсырған.
Көрмеде бесіктің шығу тарихының әріде екенін дәлелдейтін жәдігерлер бар.
"Дәстүрлі қазақы ортадағы ең көне бесік осы. Дегенмен орта ғасырлардағы археологиялық қазба барысында Тараз қалашығынан, Сарайшық қалашығынан осы бесіктің негізгі құрамдас бөлігі, түбектің табылғандығын дәлелдейтін археологиялық материалдар да осы біздің көрмеден өзінің орнын алған", - дейді Мемлекеттік орталық музейінің бас қор сақтаушысы Үміт Әшімова.
Форумға Ресейден, Түркиядан, Қырғызстаннан келген ғалымдар Наурыз мерекесінің тойлану тарихы, көшпенділер мәдениетіне қатысты зерттеулерімен бөлісті.
"Бүгін Көрісу күні басталады. Ертең, 15 наурыз Қайырымдылық күні жалғасын табады. Бұл іс-шараға жалпы Қазақстанның көптеген өңірінен, 70-тен астам музей мамандары қатынасып отыр. Бұл біздің жалпы тарихи мұраларды жинақтайтын да, насихаттайтын да музейлер болғаннан кейін біз алғашқылардың бірі болып, мемлекет басшысының Наурызнама іс-шарасын қолға алып, насихаттауды бастап кеттік", - дейді Мемлекеттік орталық музейінің директоры Рашида Харипова.
Ғылыми форум аясында музейлік тәжірибе алмасу шаралары өтеді. Ал Бесік жинағы көрмесі 15 сәуірге дейін жалғасады.