АСТАНА, 13 наурыз – Sputnik. Мәжіліс төрағасы Ерлан Қошанов Мәскеуде Ресей парламентінің өкілдерімен қандай мәселелерді талқылағанын айтты, деп хабарлайды Sputnik Қазақстан тілшісі.
Ресей мемлекеттік думасының депутаттары кейде Қазақстанның аумақтық тұтастығы, мемлекеттілігі мен тарихы туралы мәлімдеме жасап тұрады. Осыған байланысты журналистер жуырда көрші елге барып келген Ерлан Қошановтан ресейлік әріптестерімен кездесуде осы мәселе көтерілді ме деп сұрады.
"Біз бұл тақырып төңірегінде әңгімелестік. Федерация кеңесінің төрағасы Валентина Матвиенкомен сөйлестік. Екіжақты жұмыс жүргіземіз деп шештік", - деп қысқа қайырды ол мәжіліс кулуарында.
Естеріңізге сала кетейік, парламент мәжілісінің төрағасы Ерлан Қошанов Ресей Федерациясына ресми сапармен барды. 4-5 наурыз күндері ол Мәскеу және Қазан қалаларында бірқатар кездесу өткізді.
Мәжіліс спикері Мәскеуде Ресей Федералдық жиналысы Мемлекеттік думасының төрағасы Вячеслав Володинмен және Ресей Федералдық жиналысы Федерация кеңесінің төрағасы Валентина Матвиенкомен кездесті.