АЛМАТЫ, 13 наурыз – Sputnik. АҚШ президенті Джо Байден мемлекеттік хатшы Энтони Блинкенге Украинаға 126 миллион долларға дейін көмек көрсетуді тапсырды.
Бұл туралы Ақ үйдің сайтында жарияланған меморандумда айтылған.
"Мен мемлекеттік хатшыға АҚШ-тың қауіпсіздік мүдделері үшін Украинаға 126 миллион долларға дейін көмек бөлудің маңыздылығын анықтау өкілеттігін беремін", - делінген құжатта.
Бұған дейін АҚШ Украинаға 300 миллион доллар көлеміндегі әскери көмектің "тосыннан берілген" пакетін жіберетіні белгілі болған еді.
Бұл туралы АҚШ президентінің ұлттық қауіпсіздік жөніндегі кеңесшісі Джейк Салливан айтты. Пакетке артиллериялық оқ-дәрілер мен HIMARS реактивті зымыран жүйелеріне арналған GMLRS снарядтары кіреді.
Бұл АҚШ-тан Украинаға көрсетілетін биылғы алғашқы көмек болмақ.
АҚШ президентінің ұлттық қауіпсіздік жөніндегі көмекшісі Джейк Салливанның айтуынша, бұл пакет Киевке бір-екі аптаға ғана жетеді.
АҚШ билігінің Киевке бөлген соңғы қаржысы 2023 жылдың желтоқсанында таусылды. Транштың құны 250 миллион долларды құрады.