АСТАНА, 6 наурыз – Sputnik. Солтүстік Қазақстан облысында мәслихат депутаты Павел Булаев тергеуге алынды, деп хабарлайды Sputnik Қазақстан тілшісі.
Булаев Петропавл әкімдігіне қарасты шаруашылық жүргізу құқығындағы "Тазарту, су бұру және су өткізу құрылыстары" мемлекеттік коммуналдық кәсіпорнын басқарады. Сыбайлас жемқорлыққа қарсы іс-қимыл агенттігі оған және оның орынбасарларына қатысты тергеу шараларын бастады.
"Лауазымды тұлғалар 2020-2022 жылдар кезеңінде үлестес кәсіпорындармен дауыл желілерін реконструкциялау, сорғы станцияларын жөндеу және арнайы техниканы жалдау бойынша қызметтер көрсетуге жалған шарттар жасасу жолымен жалпы сомасы 258 млн теңгеге бюджет қаражатын жымқырғаны үшін айыпталып отыр", - дейді агенттіктің ресми өкілі Арман Тілеукенов.
Сот санкциясымен мәслихат депутаты қамауға алынды. Тергеу шаралары жалғасуда.