АСТАНА, 5 наурыз – Sputnik. Америкалықтардың басым бөлігі президент Джо Байден әкімшілігінің агрессивті саясатына қарамастан Ресей Федерациясымен жақсы қарым-қатынаста болғысы келеді, ал АҚШ пен Ресейдің жақындасуына потенциал бар. Бұл туралы Бүкіләлемдік жастар фестивалінде АҚШ делегациясының басшысы Калеб Мопин айтты, деп жазды РИА Новости.
"Біз өзімізді бейбітшілік елшісі, жағдайды ушықтыратын жолды ұстанып отырған Байден әкімшілігіне қарағанда Ресеймен бейбітшілікті қалайтын көпшілік Америка халқының өкілі деп санаймыз", - дейді Калеб Мопин.
Оның пікірінше, "нағыз Америка" БРИКС, ЕАЭО елдерін және "Бір белдеу, бір жол" бастамасын қамтитын әлемдік экономиканың бір бөлігі болғысы келеді және "күйреп жатқан империалистік тәртіпті" қорғамайды.
"Егер өнеркәсіп пен өсуге негізделген бұл экономика Құрама Штаттарда орнығатын болса, Америка Құрама Штаттары мен Ресей жақындай түсер еді", - деп толықтырды Мопин.
Бүкіләлемдік жастар фестивалі 1-7 наурыз аралығында Ресейдің Сириус федералды аумағында өтеді.