АСТАНА, 5 наурыз – Sputnik. Қазақстанға 41 шетелдік компания релокация жасаған, тағы 37 компаниямен жұмыстар жүріп жатыр. Бұл туралы ұлттық экономика вице-министрі Бауыржан Құдайбергенов мәлімдеді, деп хабарлайды Sputnik Қазақстан тілшісі.
Айтуынша, тізімге отыздан астам елден 400-ге тарта компания енген.
"Бүгінде құны 1,5 млрд доллардан асатын 41 компания бойынша нақты нәтиже бар. Сіздер бұл компанияларды білесіздер. Қазір тағы 37 компаниямен тиісті жұмыс жүріп жатыр. Әзірге қандай компаниялар екенін айта алмаймын. Жұмыс қорытындысы бойынша қосымша ақпарат ұсынамыз", - деп сендірді Құдайбергенов үкіметте өткен баспасөз мәслихатында.
Ол 37 компания бойынша жұмысты жыл соңына дейін аяқтау жоспарланып отырғанын атап өтті.
"Әрбір компаниямен жұмыс жеке жүргізіледі. Олардың нақты талаптары бар. Біреулері тек қана жер телімін, енді біреулері жеңілдіктер мен артықшылықтар сұрайды. Сол себепті салалық мемлекеттік органдар, ҚазақИнвест жұмыс жүргізіп жатыр", - деді вице-министр.
Оның айтуынша, елімізге көшкелі отырған компаниялар өңдеу өнеркәсібі, ІТ, тау-кен өндіру салаларында жұмыс істейді.