АСТАНА, 14 ақпан – Sputnik. Астананың бас санитарлық дәрігері Сархат Бейсенова қала тұрғындарын адамдар көп жиналатын орындарға бармауға үндеді, деп хабарлайды Sputnik Қазақстан тілшісі.
Қалада ауа-тамшы жолымен берілетін жұқпалы аурулар өршіп кетті. Осыған байланысты бас мемлекеттік санитариялық дәрігер 8 ақпанда арнайы қаулы шығарды. Оған сәйкес, халық көп жиналатын жерлерде бетперде пайдалану қажет.
"Біз әуежайлар, теміржол вокзалдары, базарлар, сауда және ойын-сауық орталықтары, сауда үйлері, театрлар, кинотеатрлар, ХҚКО, банктер туралы айтып отырмыз. Сондай-ақ маскаларды қоғамдық көліктің барлық түрінде қолдану ұсынылады", - деді Бейсенова бүгінгі брифингте.
Сонымен қатар ол қала тұрғындарын жаппай іс-шараларға қатыспауға шақырды, әсіресе адамдар көп жиналатын жерлерге балалармен бармаған жөн.
Айта кетері, Астанада тұмауды жұқтырғандардың саны артып келеді. Бұдан бөлек, ересектер арасында қызылша ауруы өршіп кетті.