АСТАНА, 9 ақпан - Sputnik. Путин Ресей мен Украинаның ерте ме, кеш пе келіссөздер жүргізетінін мәлімдеп, Такер Карлсонмен сұхбатта басты сұрақтардың біріне жауап берді, деп хабарлайды РИА Новости.
Екі сағаттық сұхбатта ресейлік көшбасшы арнайы операцияның басталу себептері, АҚШ-пен қарым-қатынас туралы айтып, "Солтүстік ағындардағы" лаңкестік шабуылға және америкалық журналист Эван Гершковичтің тағдырына қатысты өз бағасын берді.
Агенттіктің айтуынша, Ресей басшысы америкалық БАҚ-қа бұған дейін 2021 жылы сұхбат берген екен.
Такер Карлсонға "Сіз екеуміз ток-шоу жасап отырмыз ба, әлде байыпты әңгіме бола ма?" деген Путин сұхбатты әзілмен бастады.
Біз келісімге келеміз: Путин халықтардың бірігуі туралы
Әңгіме сұхбаттың басты тақырыбы болған Украинадан басталды. Сұхбатта Ресей Федерациясының басшысы Украинадағы жағдайды келіссөздер арқылы шешуге қол жеткізгісі келетінін айтты. Ерте ме, кеш пе Мәскеу мен Киев келісімге келіп, бауырлас халықтар арасындағы қарым-қатынас қалпына келеді. Ол "халықтардың бірігетініне" сенімді.
"Ерте ме, кеш пе, біз бәрібір келісімге келеміз. Ал сіздер не білесіздер? Бүгінгі жағдайда бұл тіпті оғаш көрінуі мүмкін: халықтар арасындағы қарым-қатынас бәрібір қалпына келеді. Бұл көп уақытты қажет етеді", - деді ол.
Путин украиналықтар өздерін орыстар деп санайтынын еске салды. Ұрыс даласында оларға берілуді ұсынғанда, украиналықтар "орыстар берілмейді!" деп бас тартып, қаза тапты. Ресей президенті бұны азаматтық соғыс элементтері деп атады.
"Батыстағылардың барлығы ұрыс орыс халқының бір бөлігін екіншісінен мәңгілікке ажыратты деп ойлайды. Жоқ, олай емес. Халықтар қайта бірігеді. Олар жойылған жоқ", - деп түйіндеді Ресей президенті.
Денацификация дегеніміз не
Владимир Путин Ресейдің Украинадағы арнайы операцияның мақсаттарының бірі деп жариялаған "денацификация" туралы толығырақ түсінік берді.
Бұл ұлтшыл идеологияны сақтауға тырысатындардан құтылу, деп атап өтті Ресей президенті. Мысалы, канадалық парламентте нацистерге қол шапалақтау – Гитлердің ісі әлі де өмір сүріп жатқанының дәлелі, сондықтан нацистік идеология толығымен жойылды деп айтуға болмайды, дейді Путин.
Путин Канада парламентінде СС әскерінде қызмет еткен және орыстарды, поляктарды және еврейлерді жеке өзі өлтірген Украина ұлтшылына қол шапалақтаған оқиға белгілі, бірақ "Батыс елдері үнсіз қалғанын" атап өтті. Путин Украинада ұлтшыл жандайшаптар ұлт қаһармандарына айналғанын және бұл "тәжірибе мен теорияны" тоқтату керектігін ерекше атап өтті.
"Солтүстік ағындарды" кім жарып жіберді
Путин Карлсонның "Солтүстік ағындарды" кім жарып жібергені туралы сұрағына "Әрине, сен" деп әзілмен жауап берді,
Путиннің айтуынша, өзінің дәлелдерімен Ресейге үгіт-насихат соғысына түсудің еш мәні жоқ. Өйткені Америка Құрама Штаттары әлемдегі барлық БАҚ-ты бақылап отыр. Мәскеуде қажетті нәтиже бермейтін ақпарат көздерін жарықтандыруға негіз жоқ. Оның үстіне, не болғаны бүкіл әлемге түсінікті, деді Путин.
Гершковичтің алдағы тағдыры не болады
Владимир Путиннің айтуынша, Ресейде тыңшылық жасады деп айыпталған Wall Street Journal журналисі Эван Гершковичтің босатылуы серіктестік арналар арқылы талқыланады.
"Олар бір-бірімен байланыста және олар осы тақырыпты талқылап жатыр. Бізде бұл мәселені шешпеу туралы ешқандай тыйым жоқ. Оны шешуге дайынбыз, бірақ арнайы қызметтер арасындағы серіктестік арналар арқылы талқыланатын белгілі бір шарттар бар. Менің ойымша, бұған келісуге болады", - деді Путин.
Оның айтуынша, Гершкович "жабық, құпия ақпарат алды және оны дасырын түрде жасаған".
"Білмеймін, біреу оны осы іске тартуы мүмкін, мүмкін, ол бәрін абайсызда, өз бастамасымен жасаған шығар. Бірақ шын мәнінде бұл тыңшылық деп аталады. Мұның бәрі дәлелденді, өйткені ол бұл ақпаратты алған кезде ұсталып қалды", – деді Путин.
Ол барлау қызметтері арасында диалог жүріп жатқанын, бұл "тыныш, кәсіби деңгейде шешілуі керек" екенін айтты.
"Мен де оның (Гершкович – Sputnik) үйіне қайтқанын қалаймын. Мұны шын жүректен айтып тұрмын. Бірақ диалог жүріп жатыр. Біз мұндай нәрселерді неғұрлым көп жарияласақ, соғұрлым қиын болады. Бәрі тыныш болуы керек", - деп қорытындылады президент.
Ресей және Батыс
АҚШ пен Ресей арасындағы қарым-қатынас туралы айта отырып, Путин АҚШ-тың бұрынғы президенті Билл Клинтонның Ресей НАТО-ға кіре ала ма деген сұрағына қандай реакция танытқанын еске салды.
Президент Путин сонымен бірге АҚШ-пен және Еуропамен бірлескен зымыранға қарсы қорғаныс жүйесін құру идеясын да еске түсірді.
"Мен АҚШ, Ресей және Еуропа бірігіп зымыранға қарсы қорғаныс жүйесін жасауды, оларға үшеу болып жұмыс істеуді ұсындым", - деп атап өтті ол.
Путин бұл ұсынысқа өте қызық жауап алған. Идеяны одан әрі талқылау кезінде батыстық серіктестер бұл туралы ойлану керек екенін және кейбір ерекшеліктер барын айтқан.
"Ақырында бізді қуып жіберді. Мен сізге егжей-тегжейлі айтпай-ақ қояйын, себебі бұл дұрыс емес деп ойлаймын. Өйткені бұл құпия әңгіме болды. Бірақ біздің ұсыныстың қабылданбады", - деді ол.
Оның айтуынша, Ресей оған жауап ретінде зымыранға қарсы қорғаныс жүйесін еңсеретін соққы жасауға мәжбүр болған.