АЛМАТЫ, 5 қаңтар – Sputnik. Павлодарда жарамдылық мерзімі өтіп кеткен вакциналар пайдалануға берілген, деп хабарлайды облыстық прокуратура.
Облыстық прокуратура егу науқаны кезінде медициналық ұйымдарды тексерген.
"21 млн теңгеден астам сомаға 9,5 мыңнан астам жарамсыз вакцинаны пайдалану фактілері анықталды. Атап айтқанда, денсаулық сақтау басқармасының орталықтандырылған сақтау қоймасынан жарамдылық мерзімі өтіп кеткен дәрі-дәрмектер медициналық мекемелерге жіберілген", - дейді прокуратура.
Павлодар емханаларының біріне "Пентаксимнің" 135 дозасы препараттың қолданылу мерзімі аяқталған күні берілген.
"Мерзімі өткен препараттармен 2 бала вакцинацияланған. Қарсы тексеру кезінде кәмелетке толмағандарды қызылшаға қарсы жалған вакцинациялау фактілері анықталды", - деп жазылған хабарламада.
Прокуратураның айтуынша, жарамсыз препараттар жойылып, кінәлі адамдар жауапқа тартылған.