АЛМАТЫ, 2 ақпан – Sputnik. Орал қаласындағы "Сәби" балабақшасында балалардың үстіне шкаф құлап кетті, деп хабарлады облыстық денсаулық сақтау басқармасының баспасөз қызметі.
Оқиға 1 ақпанда болған. Балабақшада үлкен топтағы бүлдіршіндердің үстіне шкаф құлаған. Балаларды қорғап қалмақ болған тәрбиеші де дене жарақатын алған. Балабақша мамандары жедел жәрдемге хабарласқан.
"Жедел жәрдемге шақырту сағат 11.30-да келіп түсті. Зардап шеккендер саны 5, оның 4-уі бала. 1976 жылғы әйел адамның жамбас тұсының жұмсақ тіндері көгеріп қалған. Ол көпбейінді қалалық ауруханаға жеткізілді. Амбулаториялық бақылау тағайындалып, үйіне жіберілді", - дейді денсаулық сақтау басқармасы.
Ал 4 бала көпбейінді облыстық балалар ауруханасына жеткізілген.
"4 бүлдіршін де қыз балалар. Төртеуінің де денесі көгеріп қалған. Барлық баланың жағдайы қанағаттанарлық, амбулаториялық ем тағайындалып, үйге жіберілді. Пациенттердің барлығы қажетті медициналық тексеруден өтті", - дейді ведомство.