АСТАНА, 28 қаңтар - Sputnik. Петропавлдағы көпқабатты үйдің шатыры опырылды, деп хабарлады қала әкімі Серік Мұхамедиев.
"Қалада соңғы күндер қарлы болды, жауын-шашын нормадан екі есе көп жауды. Бүгін Абай көшесі, 84 үйінде қар мен мұздың салдарынан шатыр жартылай құлап кетті", - деп жазды Мұхамедиев әлеуметтік желілерде.
Бұл үйдің шатыры бір де бір рет жөндеу көрмеген. Қазіргі уақытта үйдің төбесі тексеріліп жатыр. Кейін тұрғындармен бірлесіп одан әрі қалпына келтіру жөнінде шешім қабылдайтын болады,
Қаладағы көп пәтерлі тұрғын үйлердің басым бөлігі 80-ші жылы тұрғызылған. Жөндеу жұмыстары осы күнге дейін жүргізілген жоқ және үй тұрғындары тарапынан да тиісті көңіл бөлінбеді, деп қосты Мұхамедиев.
Әкім жекеменшік пәтер иелері кооперативінің төрағаларына, тұрғын үйлердің тұрғындарына апатты жағдайларды болдырмау үшін шатырларды қар мен мұздан уақтылы тазарту туралы өтінішпен жүгінді.