АЛМАТЫ, 25 қаңтар – Sputnik. Жетісу облысында коммуналдық қалдықтарды кәдеге жарату қызметін көрсететін кәсіпорын міндетті төлемдерді төлеуден жалтарып келген, деп хабарлайды облыстық прокуратура.
Кәсіпорын 2020-2023 жылдар аралығында Талдықорған қаласындағы тұрмыстық қатты қалдықтар полигонына қызмет көрсеткен.
"Кәсіпорын осы жылдарда полигонға 24 мың тонна көлемінде тұрмыстық қатты қалдықтар тасылды деп есеп берген. Алайда мекеменің есептерін талдау және өзара есеп айырысуларын салыстыру кезінде 41 контрагент анықталды, олар полигонға 138 мың тоннадан астам қатты қалдық тасымалдаған. Бұл цифр кәсіпорынның ресми есептерінде көрсетілгеннен 114 мың тоннаға артық", - дейді прокуратура.
Кәсіпорын Әкімшілік құқық бұзушылық туралы кодекстің 328-бабының 1, 6-бөлігі бойынша қоршаған ортаға шығарылған тұрмыстық қатты қалдықтардың лимиттерін асырғаны үшін әкімшілік жауапқа тартылып, оған 2,3 млрд теңге мөлшерінде айыппұл салынды, дейді ведомство.