АСТАНА, 23 қаңтар – Sputnik. Алматы қаласының мектептері мен колледждерінде 1-ауысымдағы оқушылар мен студенттер үшін сабақтар болмайды.
"Қала мектептері мен колледждерінде түні бойы халықты қабылдау пункттері жұмыс істеуіне байланысты, 23 қаңтар күні Алматы қаласының мектептері мен колледждерінде 1-ауысымдағы сабақтар болмайды",- делінген Алматы қалалық білім басқармасының хабарламасында.
Басқарманың мәліметінше, балабақшалар штаттық режимде жұмыс істейді.
Еске салайық, төтенше жағдайлар министрлігіне қарасты "СТӘК" ЖШС-ның сейсмикалық стансалар желісі Алматы уақытымен 23 қаңтар күні 00 сағат 09 минутта жер сілкінісін тіркеді. Жер сілкінісі Алматыда 5 балл деңгейінде сезілді.
Алматылықтардың айтуынша, жерасты дүмпуі осы жолы қатты сезілді. Үйлері ұзақ уақыт бойы шайқалған. Тұрығындар үрейленіп, үйлерін тастап, далаға шығып кеткен.