АСТАНА, 22 қаңтар – Sputnik. Қазақстанның көлік вице-министрі Талғат Ластаев Дүниежүзілік банк тобының Халықаралық қаржы корпорациясының (IFC) өкілдерімен әуежайлар мен логистикалық парктерді дамыту саласындағы ынтымақтастықты талқылады. Бұл туралы ведомствоның баспасөз қызметі хабарлады.
"Тараптар кейбір қазақстандық әуежайларды, құрғақ порттарды және логистикалық парктерді дамыту бойынша ынтымақтастық мәселелерін қарастырды", - деп жазылған хабарламада.
Сонымен қатар кездесуде Қазақстанның Қытаймен шекарасында үшінші өткізу пунктінің құрылысы, Транскаспий халықаралық көлік бағытын одан әрі дамыту, Ақтау портындағы контейнерлік хаб және "Саржа" көп функциялы теңіз терминалы, сондай-ақ бірқатар автомобиль жолдарын қайта құру жөніндегі жобалармен таныстырды.
"Алдағы 5 жылда көлік саласында алға қойылған барлық міндеттерді жүзеге асыру үшін, соның ішінде транзиттік мүмкіндіктерді арттыру үшін шамамен 40 миллиард доллар қажет", - деді Ластаев.
Оның айтуынша, министрлік теміржол және теңіз көлігі, авиация және автомобиль жолдары салаларында 36 жобадан тұратын пул қалыптастырды. Оның 12-сі іске асырылуда, ал 24 жоба болашақтың еншісінде тұр, деп хабарлады ведомстводағылар.
"Біз Abu Dhabi Ports, Ляньюньган, PSA, FESCO, COSCO Shipping, Rhenus, SOVICO, Terminal Holding, TAV Holding порттары және басқалармен жұмыс істеп жатырмыз", - деді вице-министр.
Қаржы корпорациясы мен ведомство өкілдері көлік саласындағы жемісті ынтымақтастыққа қатысты сенім білдірді, деп хабарлады ведомствоның баспасөз қызметі.