АСТАНА, 18 қаңтар - Sputnik. Сенат депутаты Ақмарал Әлназарова парламент палаталарының бірлескен отырысында қандай мәселелер қаралатынын жария етті, деп хабарлайды Sputnik Қазақстан тілшісі.
Бүгін сенатта өткен брифингте журналистер ертеңгі отырыстың не себепті өткізілетінін сұрады.
"Парламенттің құзіретіне кіретін бірнеше функция бар. Барлығы Конституциямен бекітілген. Соның бірі – Қазақстанның өзіне алған міндеттемелері бойынша бітімгерлік миссиялары. Осыған байланысты президент тарапынан ұсыныс түсіп жатса, оны парламент палаталарының бірлескен отырысында қарап бекітеді. Негізгі қаралатын мәселе осы болады деп жоспарланып отыр", - деді Әлназарова.
Сенатор қазақстандық бітімгерлер нақты қай елге жіберілетінін айтқан жоқ.
"Ертең бірлескен отырыста бәріміз бірге білетін боламыз", - деп атап өтті депутат.
Еске сала кетейік, ертең сағат 10:00-де парламент палаталарының бірлескен отырысы өтеді.