АСТАНА, 18 қаңтар – Sputnik. Беларусь билігі Қазақстандағы 2022 жылғы қаңтар оқиғасы кезіндегі тәжірибені жаңа әскери доктринада ескеру туралы шешім қабылдады. Бұл әрекет батыстың сайлау науқаны кезінде республикада төңкеріс және "түрлі-түсті революция" жасау әрекетінің қаупіне байланысты жасалып отыр.
Бұл туралы РИА Новостиге Беларусь парламенті төменгі палатасының халықаралық істер жөніндегі комиссиясы басшысының орынбасары, Беларусь либералдық-демократиялық партиясының жетекшісі Олег Гайдукевич мәлімдеді.
Сейсенбі күні Минскіде Беларусь Қауіпсіздік кеңесінің отырысы өтіп, онда басқа мәселелермен қатар бүкіл Беларусь халық жиыны мақұлдауы тиіс жаңа әскери доктрина жобасы да қаралды.
Қорғаныс министрі Виктор Хренин оны дайындау кезінде төңкеріс әрекетінен аман қалған Қазақстанның тәжірибесі де ескерілгенін айтты.
"Әскери доктрина біздің елге төніп тұрған жаңа сын-қатерлер мен қауіптерді ескереді", - деді Гайдукевич.
Ол тікелей әскери араласудан бұрын "түрлі-түсті революция" және төңкеріс арқылы Беларусьті тұрақсыздандыру сценарийі Батыс үшін өзекті екенін айтты.
"Батыс Беларусьті, Ресейді және Одақтас мемлекетті жоюды армандайды. Бірақ мұны әскери жолмен жүзеге асыру мүмкін емес. Олар Беларуське, Ресейге неге тікелей шабуыл жасамайды? Олар жаппай шабуылдан қорқады ма? Өйткені олар әскери жоспармен Ресейді де, Беларусьті де ешқашан жеңе алмайтынын біледі", - деді депутат.
Ол сондай-ақ ҰҚШҰ рөліне де тоқталып өтті.
"ҰҚШҰ елдері, соның ішінде ұйымның Қазақстандағы оқиғаларға реакциясы аясында өз қауіпсіздігін қамтамасыз етуде осы құрылымға көбірек көңіл бөле бастады. Ұжымдық қауіпсіздік шарты ұйымын дұрыс емес деген сынды естігенде, бұл өтірік деп нақты айта аламын. Альянстар кейбір қарама-қайшылықтарсыз болмайды. НАТО-ны қараңыздар, миллиондаған қайшылық бар. ҰҚШҰ-да да даулар болуы мүмкін, бірақ маңызы бойынша ұйым өте тиімді", - деді Гайдукевич.
Ол ұйымның НАТО-дан қорғаныс бағыты бойынша ерекшеленетінін айтты.
"ҰҚШҰ-да, мысалы, Қазақстанда тұрақсыздық болса, ол Ресей мен Беларуське тарайды, Ресейде тұрақсыздық болса, бүкіл аймаққа әсер етеді, Беларусьтегі тұрақсыздық – Ресейдегі тұрақсыздық. Егер 2020 жылы оппозиция президент сайлауының нәтижелеріне қарсы наразылық білдіру кезінде Беларусьте төңкеріс болса, бұл Ресейге тікелей әсер еткен болар еді. ҰҚШҰ аясында түрлі-түсті революцияларға және біздің елдің ішкі істеріне араласуға қарсылық дамиды. Біз бұған үлкен назар аударамыз, өйткені бұл біздің елдеріміз бен азаматтарымыздың қауіпсіздігі", - деді Гайдукевич.
Еске сала кетейік, Қазақстанда 2022 жылдың алғашқы күндерінде жаппай наразылықтар басталған еді. Елдің батысындағы Жаңаөзен мен Ақтау қалаларының тұрғындары сұйытылған газ бағасының екі есеге өсуіне қарсы болды. Кейін наразылықтар басқа қалаларға, соның ішінде Алматыға да тарады: онда тонау басталып, содырлар мемлекеттік мекемелерге шабуыл жасап, қару-жарақтарды алып кетті.
Бұған жауап ретінде билік 19 қаңтарға дейін ел аумағында төтенше жағдай жариялап, стратегиялық нысандарды күзету үшін ҰҚШҰ бітімгершілік күштерін тартып, лаңкестікке қарсы операция жүргізді.