АСТАНА, 17 қаңтар – Sputnik. Жаппай жеткізілім басталғалы бері Қазақстанда екі электромобиль өртенген, деп хабарлады Мәжіліс отырысында Қазақстанның төтенше жағдайлар министрінің орынбасары Бауыржан Сыздықов.
Қазақстанның төтенше жағдайлар министрлігі электромобиль өртін сөндіру бойынша әлемдік тәжірибені зерделеуде.
"Қазақстанға электромобильдер жаппай әкелінгелі бері екі өрт оқиғасы болды. 2022 және 2023 жылдары. Zeekr және Tesla көліктері өртеніп, ол ұнтақпен сөндірілді", - деді ТЖМ қызметкері.
Бүгінгі таңда электромобиль өртін сөндірудің екі әдісі әзірленді: су және ұнтақпен.
"Біз басқа елдердің тәжірибесін зерттеп жатырмыз. Литий-ионды аккумулятордың қалай әрекет ететінін түсіну маңызды. Өрт болса, біз оны сөндіруге дайынбыз", - деп сендірді ТЖМ өкілі.
Депутат, Мәжілістің қаржы және бюджет комитетінің мүшесі Самат Мұсабаев Қазақстанда электромобильдер санының қарқынды өсіп жатқанын айтты.
"2023 жылдың 1 қаңтарындағы жағдай бойынша электр қозғалтқышы бар 812 жеңіл автокөлік тіркелді, он екі айдың қорытындысы бойынша – 7 793. Бұл электромобильдер санының 9,5 есеге өскенін көрсетеді", - деді депутат Самат Мұсабаев.
Депутаттардың айтуынша, елімізде "жасыл" көліктерге сұраныс артып келеді. Сондықтан бұл қажетті инфрақұрылымды дамытуды талап етеді.