АСТАНА, 5 қаңтар – Sputnik. Алматы қаласы экология және қоршаған ортаны қорғау басқармасы әкімдік пен құрылыс компаниясын Алатау ауданындағы Дарабоз шағын ауданындағы жасыл алқапты заңсыз кесіп тастады деп айыптаған қоғам белсенділеріне жауап берді.
Қала әкімдігінің хабарлауынша, "Qazaq Story Almaty" компаниясы тұрғын үй кешенін салу үшін ағаштардың бір бөлігін кесуге қолданыстағы заңнамаға сәйкес рұқсат алған. Алайда ағаш кесу кезінде құрылыс компаниясы тағы 170-тен астам ағаш пен 40 бұтаны заңсыз кесіп, барлығы 216 жасыл желекті жойған.
"Осыған байланысты экология және қоршаған ортаны қорғау басқармасы мамандандырылған табиғатты қорғау прокуратурасы және табиғатты қорғау полициясы қызметкерлерімен бірлесіп, келтірілген залалды есептеуді қамтитын жасыл желектерді тексеру актісін толтырды", - деп хабарлады Алматы әкімдігі.
Аталған факті бойынша Алматы қаласы Алатау ауданының полиция басқармасы ҚР Қылмыстық кодексінің 340-бабы – "Ағаштар мен бұталарды заңсыз кесу, жою немесе зақымдау" бойынша қылмыстық іс қозғады.
Сондай-ақ әкімдік 2023 жылдың шілдесінен бері "Qazaq Story Almaty" ЖШС мемлекеттік қызметтер порталы арқылы тұрғын үй кешенінің құрылысы аумағында ағаштарды кесуге рұқсат алу үшін 6 рет өтініш жолдағанын хабарлады.
Алайда ұсынылған материалдарда жасыл желектер туралы мәліметтер бар сараптама қорытындысының болмауына байланысты барлық өтінішті қанағаттандырудан дәлелді бас тартылған.
Десе де құрылыс жүргізуші компания 2023 жылдың желтоқсан айының басында тұрғын үй кешенін салу үшін жасыл желектерді кесуге рұқсат алу үшін басқа құжаттармен бірге тиісті сараптама қорытындысын ұсынды.
"Ағаштарды кесуге рұқсат беру мемлекеттік қызмет болып табылады. Сондықтан қажетті құжаттар ұсынылған жағдайда ағаштарды кесуге рұқсат беруден бас тарту мүмкін емес", - деп мәлімдеді Алматы әкімдігі.
Сондай-ақ экология және қоршаған ортаны қорғау басқармасы берген рұқсатта 2 797 ағашты кесу қарастырылғаны айтылды.
"Сонымен қатар басқарма 100 дана көлемінде жасыл желекті қайта отырғызу туралы келісті. Биіктігі 2,5 метрден кем емес, топыраққа көшеттерді отырғызу жалпы қолданыстағы жерлерге "Алматы қаласының жасыл желектерін күтіп-ұстау және қорғау ережелерінің" барлық талабын сақтап жүргізіледі", - деді қала әкімдігі.
Еске салайық, бұған дейін қоғам белсендісі Санжар Боқаев әлеуметтік желіде құрылыс салушы компания бес мыңнан астам сау ағашты заңсыз кескені туралы ақпарат жариялап, Алматы әкімдігін әрекетсіздік танытты және құрылыс компанияларының мүддесі үшін қаладағы жасыл желектерді қасақана жойып жіберді деп айыптады.