АЛМАТЫ, 5 желтоқсан – Sputnik. Ақтаудың "Каспий" футбол клубы бюджеттен 2,1 миллиард теңге жұмсады, деп хабарлады Lada.kz.
Алайда өткен маусымның қорытындысы бойынша Ақтау командасы он үшінші орынды иеленіп, Қазақстан премьер-лигасынан шығып қалды.
Маңғыстау облысы дене шынықтыру және спорт басқармасының мәліметінше, 2020 жылы "Каспийге" 1,3 миллиард теңге, 2021 жылы - 1,5 миллиард теңге, 2022 жылы - 1,7 миллиард теңге бөлінген.
Биыл қарашада мәслихаттың кезекті сессиясында "Каспий" футбол клубына қосымша 400 миллион теңге бөлу мақұлданған. Бұл ақша қарызды жабуға жұмсалуы керек еді, бірақ клубтың қаржы бөлімі қаражатқа өтінімді дұрыс рәсімдей алмаған.
Өңір билігі футбол клубының ойыншыларға, жаттықтырушыларға және қызметкерлерге қарызының жалпы сомасы коммерциялық құпия болғандықтан жария етілмейтінін мәлімдеді.
"Биыл 20 қарашадағы жағдай бойынша "Каспий" ФК маусымның аяқталуына байланысты барлық кәсіби футболшымен еңбек шартын бұзды. Қазіргі уақытта "Каспий" ФК бас жаттықтырушысымен де еңбек шарты бұзылды. Маусым соңында "Каспий" ФК бас бапкері Константин Александрович Горовенко болды. Жаттықтырушы мен ойыншылардың жалақы мөлшері коммерциялық құпия және жария етілмейді", - деп хабарлады Маңғыстау облысының дене шынықтыру және спорт басқармасы.
Биыл 3 желтоқсанда "Каспий" клубының шетелден келген футболшылары клубқа қатысты қаржылық талаптарға байланысты халықаралық футбол федерациясына (ФИФА) шағым түсіргені белгілі болды. Айтуларынша, "Каспий" футболшыларға, жаттықтырушыларға және қызметкерлерге биылғы жылдың бірнеше айының жалақысын төлемеген. Ал басшылық оларға жыл соңына дейін есеп айырысуға уәде беріп отыр, бірақ легионерлер қарызды күтпейтінін айтып, әрекет етуге шешім қабылдаған. Егер "Каспий" қарызын жаппаса, клуб ФИФА-ның санкциясына ілігеді.
Айта кетері, өткен маусымның қорытындысы бойынша Ақтау командасы он үшінші орынға түсіп, Қазақстан премьер-лигасынан шығып кеткен.