АСТАНА, 4 желтоқсан – Sputnik. Ақмола облысында инвестор жер учаскесіне мемлекеттік актіні алу кезінде әкімшілік кедергілерге тап болған. Іске прокуратура араласты.
Облыстық прокуратураның ақпаратынша, Щучье-Бурабай курорттық аймағында "Seven Development" ЖШС отандық инвесторы 150 жұмыс орнын құра отырып, жалпы құны 3,3 млрд теңгені құрайтын "балалар сауықтыру орталығының құрылысы" жобасын іске асырып жатыр.
Жобаның құжаттарын ресімдеу кезінде инвестор жер учаскесін алуда кедергілерге тап болған.
"Прокуратураның тапсырмаларынан және кәсіпкермен өткен кездесуден кейін ғана уәкілетті орган жерге құқық белгілейтін құжат берді және жобаны іске асыру жалғастырылды", - делінген хабарламада.
Прокуратура бизнес пен инвесторлардың құқықтарын қорғау мәселелері ерекше бақылауда екенін атап өтті.
Сондай-ақ ведомство проблемаға тап болған инвесторларды прокуратура қызметкерімен байланысып, облыс прокуратурасының кәсіпкерлер мен инвесторлардың құқықтарын қорғау жөніндегі Call-орталығы (байланыс нөмірі +7 705 129 11 40) арқылы құқықтық кеңес алуға шақырды.