АСТАНА, 23 қараша - Sputnik. Палестина Қызыл Жарты Ай қоғамы (PRCS) Газадағы Аш-Шифа ауруханасынан 190 жаралы мен науқасты, сондай-ақ олармен ілесіп жүретін адамдар және медициналық қызметкерлерді эвакуациялағанын мәлімдеді, деп хабарлады РИА Новости.
"Бүгін Палестина Қызыл Жарты Ай және БҰҰ командалары 190 жаралы мен науқасты, олармен ілесіп жүретін адамдарды және бірнеше медициналық бригаданы Газа қаласындағы Аш-Шифа ауруханасынан Газа секторының оңтүстігіндегі басқа ауруханаларға эвакуациялады. Дегенмен көптеген жараланған және зардап шеккен басқа адамдар медициналық қызметкерлермен бірге осы ауруханада қалды", - деп хабарлады PRCS әлеуметтік желіде.
Атап өткендей, жаралылар Хан-Юнистегі Еуропалық ауруханаға, ал диализге мұқтаж науқастар Рафахтағы "Абу Юсуф ан-Наджар" ауруханасына жеткізілді. Операцияға Қызыл жарты ай ұйымының 14 "жедел жәрдем" көлігі, БҰҰ-ның екі автобусы және басқа да көліктер қатысты.
PRCS мәлімдемесіне сәйкес, эвакуациялау процесі шамамен 20 сағатқа созылды. Өйткені Газаның солтүстігі мен оңтүстігі арасындағы бақылау-өткізу пунктерінде көліктерді тым ұзақ тексерген және оның жүруіне кедергі келтірген. Қызыл Жарты Ай ұйымы үш парамедик пен жаралылармен еріп жүретін бір адам ұсталғанын хабарлады. Парамедиктің біреуінен басқасының барлығы кейінірек босатылды, деп хабарлады PRCS.
7 қазанда Палестиналық ХАМАС қозғалысының әскери қанаты жариялаған "Әл-Ақса тасқыны" операциясы аясында Израиль Газа секторынан бұрын-соңды болмаған зымыранмен ауқымды шабуылға ұшырады. Осыдан кейін ұйым жауынгерлері Израильдің оңтүстігіндегі шекаралық аймақтарға кіріп, әскерилерге де, бейбіт тұрғындарға да оқ жаудырды, сонымен қатар 200-ден астам адамды кепілге алды. Биліктің соңғы мәліметтері бойынша, Израильде 1,2 мыңға жуық адам, соның ішінде бейбіт тұрғындар, әскерилер, шетелдік азаматтар мен жұмысшылар қаза тапты, сонымен қатар 5 мыңнан астам адам жараланған.
Бұған жауап ретінде Израиль қорғаныс күштері Газа секторында ХАМАС-қа қарсы "Темір қылыштар" операциясын бастады. Бірнеше күн ішінде израильдік әскерилер Газамен шекараға жақын орналасқан барлық елді мекенді бақылауға алып, нысандарға, соның ішінде сектор аумағындағы азаматтық нысандарға әуеден соққы бере бастады. Сондай-ақ Израиль Газа секторы толық қоршалғанын жариялады: су, азық-түлік, электрмен жабдықтау, дәрі-дәрмек және жанар-жағармай жеткізу тоқтатылды.
Израильдің Газа секторына жасаған соққыларынан қаза тапқандар саны 14 532 адамға жетті, 35 мыңнан астам адам жарақат алды.
Тараптардың аумақтық мүдделеріне қатысты Палестина – Израиль арасындағы қақтығысы ондаған жылдар бойы аймақта шиеленіс көзі болды. 1947 жылы БҰҰ шешімі екі мемлекеттің – Израиль мен Палестинаның құрылуын анықтағанмен, тек Израиль мемлекеті ғана құрылды.