АЛМАТЫ, 8 қараша – Sputnik. Қазақстан Ұлттық банкі KÓKBÓRI инвестициялық монеталары айналымға шығарылатынын хабарлады.
Жаңа KÓKBÓRI инвестициялық монеталары – ALTYN BARYS және KÚMIS BARYS инвестициялық монеталарына Ұлттық банк жүргізген ребрендингтің нәтижесі. Монетада "Көшпенділердің ғибадат жануарлары – тотемдері" сериясындағы монеталардың стилистикасы қолданылған.
KÓKBÓRI инвестициялық монеталары
© Photo
Эксклюзивті дизайн KÓKBÓRI инвестициялық монеталарын тек инвестициялық тұрғыдан ғана емес, жинау және сыйға тарту үшін де пайдалануға болады.
Инвестициялық монеталар алғаш рет бірнеше нұсқада шығарылады:
proof сапада алтыннан дайындалған номиналдар – 10, 20, 50, 100, 200 және 500 теңгелік (қорғаныш элементтері, лимитті таралым, кәдесый орамасы);
uncirculated сапада алтыннан дайындалған номиналдар – 10, 20, 50, 100, 200 және 500 теңгелік;
uncirculated сапада күмістен дайындалған номиналдар – 1, 2, 5 және 10 теңгелік;
proof сапада күмістен дайындалған номиналдар – 1, 2, 5 және 10 теңгелік (қорғаныш элементтері, лимитті таралым, кәдесый орамасы).
"Рroof сападағы алтын және күміс монеталар интерференциялық кедергі жабыны мен жасырын кескін секілді қорғаныш элементтерін пайдалана отырып жасалған. Сондай-ақ uncirculated сападағы монеталардан айырмашылығы, бұл монеталар жеке ағаш қорапта, алтын монеталар үшін қара түсті және күміс монеталар үшін ақ түстермен шығарылады", - деп жазылған Ұлттық банктің баспасөз қызметі таратқан хабарламада.
KÓKBÓRI инвестициялық монеталары
© Photo
Монеталарды шығарудағы негізгі мақсат – халыққа бағалы металдарға жинақ немесе инвестициялаудың балама құралын ұсыну.
Монеталардың ерекшеліктері:
ұзақмерзімді перспективада инвестициялық табыс табуға болады;
монеталарды сатып алу кезінде қосымша құн салығы болмайды;
бағалы металдың құрамы 99,99% құрайды (сынамасы 999,9).
Еске сала кетейік, барлық номиналдағы инвестициялық монеталар Қазақстан Республикасының бүкіл аумағында өзінің белгіленген құнына сай төлемнің барлық түрі бойынша қабылданады. Сондай-ақ Қазақстан Республикасының барлық банкінде банк шоттарына есепке алынуға және аударылуға, шектеусіз ұсақталуға және айырбасталуға тиіс.