АСТАНА, 26 қазан – Sputnik. Әділет экс-министрі Марат Бекетаев құқық қорғау органдарынан қашып кеткісі келген. Бұл туралы бас прокурордың орынбасары Әсет Шындалиев мәлімдеді, деп хабарлайды Sputnik Қазақстан тілшісі.
Қазіргі кезде Бекетаевқа қатысты қызметтік өкілеттігін асыра пайдалану бабы бойынша қылмыстық іс қозғалды.
"Соттың санкциясымен ол қамауға алынды. Қамауға алу себебі – құқық қорғау органдарынан жалтаруға әрекет етуі. Ол құқық қорғау органдарынан басқа жаққа қашпақшы болды. Сол үшін қамауға алынды", - деді Шындалиев сенатта өткен брифингте.
Журналистердің "Экс-министр әуежайда ұсталды ма?" деген сұрағына бас прокурордың орынбасары алдымен "Иә" деп жауап берді. Бірақ артынан "Нақты айта алмаймын. Әуежай туралы мен де сіздер сияқты бұқаралық ақпарат құралдарынан оқыдым" деп ақталды.
Оның айтуынша, бұған дейін күдіктінің заңсыз әрекеттері бойынша тексеріс жүргізілген. Соның нәтижесінде қылмыстық іс қозғауға шешім қабылданған.
Айта кетері, өткен демалыс күндері сыбайлас жемқорлыққа қарсы қызмет экс-министрдің ұсталғаны туралы ақпарат таратты. Бірақ аты-жөнін жарияламады. Ал бірнеше күннен кейін оның Марат Бекетаев екенін растады.