АСТАНА, 23 қазан – Sputnik. Мысырдың шекарасындағы "Рафах" өткізу-бақылау бекеті арқылы Газа секторына гуманитарлық көмектің тағы бір партиясы өтті, деп хабарлайды Sputnik Қазақстан жергілікті Sada el-Balad телеарнасына сілтеме жасап.
Солтүстік Синайдың губернаторы Мұхаммад Шушудың айтуынша, қазіргі кезде "Рафах" шекара бекетінде Қызыл жарты ай, сондай-ақ басқа да мемлекеттер мен халықаралық ұйымдар жіберген гуманитарлық, медициналық және төтенше көмек тиелген ондаған жүк көлігі тұр. Сол жерден Газа секторына көмектің жаңа партиясы келіп жеткен.
Бұдан бөлек, бақылау-өткізу бекетінде далалық госпиталь ашылды. ОндаГаза секторында жарақат алғандарға көмек көрсетіледі. Бірақ жарақат алғандар мен зардап шеккердерге шекара бекеті арқылы өтуге әлі рұқсат берілген жоқ.
Айта кетері, сенбі және жексенбі күндері Газа секторына алғашқы жүктер жеткізілген болатын.
Бүгінде қақтығыс салдарынан Газа секторында қаза тапқан адамдардың саны 4,6 мыңнан асты. 14 мың адам жарақат алды. Ал Израильде 1,3 мың адам қайтыс болды. Бұған дейін Қазақстанның сыртқы істер министрлігі Газа секторында жүздеген қазақстандықтың жүргенін хабарлады. "Рафах" бекетінен адамдарды өткізуге рұқсат берілген бойда оларды да шығарып алады.