АЛМАТЫ, 10 қазан – Sputnik. Теміртауда басына оқ атқан сарбаздың қасында ешкім болмаған. Қазақстан Ішкі істер министрлігі әскери-тергеу департаментінің басшысы Серікбай Құсайынов осындай мәлімдеме жасады, деп хабарлайды Sputnik Қазақстан.
Әскери бөлімдегі қайғылы оқиға 9 қазанда түнгі сағат 01:00 шамасында болған.
"Ұлттық ұланның 6636 әскери бөлімінде мерзімді әскери қызметші өзіне бекітілген штаттық қарудан басына жарақат салып, салдарынан қайтыс болды. Осы факт бойынша орталық өңірлік әскери тергеу басқармасы "өзін-өзі өлтіруге дейін жеткізу" фактісі бойынша сотқа дейінгі тергеуді бастады", - дейді Құсайынов.
Оның айтуынша, тергеуді тәжірибелі қызметкерлерден құрылған жедел-тергеу тобы жүргізеді. Қазіргі күні сот-медициналық сараптамалар жасалып жатыр.
"Айғақ ретінде қаза тапқан жауынгердің ұялы телефоны мен бейнебақылау камераларының жазбалалары алынды. Тергеу барысында оқиға болған кезде марқұмның жалғыз болғаны анықталды. Оқиғаны ашу үшін сарбаздың әскери әріптестерінен, командирлерінен, басқа да адамдардан жауап алынып жатыр", - дейді Серікбай Құсайынов.
Министрлік өкілінің айтуынша , жәбірленуші тараптың да уәжі толық тексеріледі.
Еске сала кетейік, әскер қатарына көктемде қабылданған сарбаз оқ жарақатынан қаза болған еді.