АСТАНА, 3 қазан – Sputnik. Риддер жылу электр орталығындағы №3 қазандық агрегатының жұмысы тоқтатылды. Қала әкімі бұл апаттық жағдайды болдырмау мақсатында жасалып отырғанын мәлім етті, деп хабарлайды Sputnik Қазақстан.
"Ережеге сәйкес, күрделі жөндеуден өткен электр станцияларының жабдықтары 48 сағат ішінде жүктеме кезінде қабылдау-тапсыру сынағынан өтуі керек. Жабдықты кешенді сынау негізгі отынмен 72 сағат бойы қалыпты және үздіксіз жұмыс істеуі жағдайында жылу электр станциясы үшін қалыпты жүктемесі және будың есептік параметрлері, судың қысымы мен шығыны ескеріле отырып жүзеге асырылады. Осығанбайланысты апаттық жағдайларды болдырмау үшін 2023 жылғы 2 қазаннан 3 қазанға дейін қосымша тексеру үшін №3 қазандық агрегатын тоқтату қажет", - деп мәлімдеді Риддер әкімі Дәулет Батырбаев.
Еске сала кетейік, 25 қыркүйек күні энергетика министрлігі Риддер жылу электр орталығындағы №3 қазандық 26 қыркүйекте іске қосылады, ал жылыту маусымы қазан айының соңында басталатынын хабарлаған болатын.